User Tag List

+ الرد على الموضوع
صفحة 1 من 4 1 2 3 ... الأخيرةالأخيرة
عرض النتائج 1 إلى 10 من 36

الموضوع: كلام في سرك : التخصص :)

Share/Bookmark
  1. #1
    بالطو من بلاطي
    التقييم التقييم التقييم التقييم التقييم التقييم التقييم التقييم التقييم التقييم التقييم التقييم
    الصورة الرمزية Medo
    تاريخ التسجيل
    Jul 2006
    الدولة
    على أرض الواقع
    المشاركات
    6,553
    مودي هو
    Bored
    Mentioned
    1 Post(s)
    Tagged
    2 Thread(s)

    كلام في سرك : التخصص :)

    لسلام عليكم ورحمة الله وبركاته
    بداية الموضوع منقول حتى تعم الفائدة
    جزى الله كاتبه خير الجزاء

    ....

    أولا، أحب أهنى كل الشباب اللى دخلوا طب، وكل الشباب اللى خلصوا طب

    وطبعا فى سؤال بيشغل بال كل الناس، يا ترى آخد تخصص إيه؟

    فى هذا الموضوع سوف أحاول أن ألقى الضوء على التخصصات الطبية المختلفة

    كل تخصص، ماله وما عليه، وبعد كده، الإحتيار لكم طبعا

    سأبدأ كلامى بنصيحة لكل اللى فى طب

    موت نفسك فى المذاكرة من أول يوم، وسيبك من الكافتيريا

    الوظيفة فى الجامعة، مع إنها مش مثالية، لكنها أفضل حاجة موجودة حاليا


    تنقسم أقسام الكلية إلى:

    أقسام أكاديمية:

    ودى الأقسام اللى بتدرسوا فيها لغاية سنة تالتة

    والعمل بها داخل الكلية والمعامل، ولا علاقة لها بالمرضى ولا بالمستشفى

    وتشمل أقسام التشريح، والفسيولوجى، والكيمياء الحيوية، والهستولوجى،

    والفارماكولوجى، والباثولوجى، والميكروبيولوجى، والباراسيتولوجى

    والطب الشرعى، وطب المجتمع


    الأقسام الإكلينيكية:

    ودى الأقسام اللى بتدرسوا فيها من سنة رابعة وإنت طالع:

    وطبعا العمل بها بيكون فى الكلية والمستشفى

    وتشمل:

    الأقسام العامة: الباطنة العامة، الجراحة العامة، النساء والتوليد، والأطفال

    أقسام الباطنة الخاصة: القلب، الصدر، الأعصاب، الروماتزم، التحاليل، الجلدية، النفسية، المتوطنة.

    أقسام الجراحة الخاصة: جراحة العظام، المسالك البولية، جراحة القلب والصدر

    جراحة المخ والأعصاب، التخدير، الأشعة

    بالإضافة لطب وجراحة العيون، و جراحة الأنف والأذن


    ....
    على بركة الله، نبدأ بقسم
    "أمراض القلب والأوعية الدموية"

    من أجمل تخصصات الطب، وأحمل تخصصات الباطنة بدون منافس

    وبإعتراف التخصصات الأخرى

    العمل به يشمل العديد من الأنشطة والتخصصات الفرعية، وإنت ومزاجك

    يعنى لو إنت غاوى شغل الباطنة، عندك سماعتك، وجهاز الضغط، ومريضك،

    والعيادة الخارجية، وعيش، وكفاية إنك الوحيد اللى حتعرف تقرا Ecg

    لو إنت غاوى شغل أشعة وفحوصات، عندك شغل الموجات الصوتية "الإيكو"

    وده إحنا اللى بنعمله مش بتوع الأشعة

    ده غير المسح الذرى، ورسم القلب بالمجهود، وكل ده إحنا بنشتغله

    لو إنت غاوى شغل جراحة، وبتحب منظر التعقيم، والإيفوريا بتاعة الجراح

    يبقى عليك وعلى شغل القسطرة، ودى طبعا موضة اليومين دول

    ما فيش حد فينا إلا فى عيلته حد عمل أو حيعمل قسطرة

    لو إنت غاوى شغل عناية مركزة، إحنا بتوع العناية المركزة

    وطبعا كل الحاجات دى بتفتح باب شغل كويس، ومصدر رزق معقول

    لطبيب القلب، من مختلف الأنشطة، وإحنا مطلوبين جدا، بره وجوه

    طبعا أنا عمال أقول شعر فى القلب، لكن ما فيهوش عيوب؟

    طبعا فيه:

    أولا، شغله مرهق جدا، نيابة القلب من أصعب النيابات

    عندك شغل العناية، والقسم، والعيادة، وتحضير القسطرة

    ده غير إنك لازم تشوف أى مريض داخل يعمل أى جراحة

    فى أى قسم فى الكلية، علشان تقول لو قلبه يستحمل تخدير ولا لأ

    بالمناسبة، التخصص ده غير ملائم للبنات، إلا إذا كانت فدائية، ومسترجلة

    وهى حتتعب فى النيابة، لكن بعد كده ممكن ترتاح

    ثانيا، كم المعلومات الضخمة اللى لازم تقراها، وتعرفها

    وكل يوم فى كلام جديد، وأدوية جديدة، وقساطر ودعامات جديدة

    لازم تكون قارى وفاهم ومصحصح للى حواليك



    انتظرونا مع باقى التخصصات

    يتبع,,,,

    ---------- Post added at 08:31 AM ---------- Previous post was at 08:28 AM ----------

    الباطنة العامة
    بلا منازع، الباطنة العامة هى أم العلوم الطبية

    الشغل فيها مجاله واسع جدا

    طبعا لازم نكون عارف معظم الحاجات عن كل تخصصات الباطنة الخاصة

    طبعا مش بكل التفاصيل زى المتخصصين فيها

    غير كده، فى تخصصات فرعية داخل الباطنة العامة، ومميزة ليها

    زى أمراض الكلى، أمراض الدم، الأورام، والغدد الصماء، والحميات والعدوى

    مجالات العمل واسعة، بقدر إتساع هذا التخصص الديناصورى

    طبيب باطنى، عناية مركزة، متابعة ماكينات الغسيل الكلوى، وطبعا ما ننساش المناظير

    لكن، لازم تاخد تخصص دقيق داخل الباطنة العامة،

    وتذكر إن الطبيب الكشكول، اللى بيعرف كل حاجة، ما عادش ليه مكان النهاردة

    طبعا محتاج مجهود رافى، وقراية مووووووت، حتقرا فى كل حاجة فى الطب، مأساة ....
    لو فى أى أسئلة عن التخصصين اللى شرحتهم، ما تترددش

    ....

    النساء والتوليد
    تخصص النساء والتوليد من التخصصات المتميزة فى الطب

    يكفى إنك الطبيب الوحيد اللى زباينك "بيزغرطوا"

    باقى الأطباء يا فى صويت، يا إما "حمد الله على السلامة"

    ويكفى إنك يوميا بتشوف معجزة فصل حياة عن حياة

    وبتتابع إبداع الخالق جل وعلا، من بداية تكوين الجنين، حتى ولادته

    العمل فى هذا التخصص، مجزى ماديا لحد كبير

    "الستات لا حيبطلوا حمل ولا خلفة"

    وحتى لو حيبطلوا، حيجولك علشان تساعدهم فى إختيار وسيلة منع الحمل

    العمل فى هذا التخصص يرضى طموحات الطبيب، لإتساع مجالات العمل به

    فلكى تكون طبيب نساء جيد، لابد أن تكون طبيبا باطنيا جيدا

    وجراحا جيدا، ومتمكن فى الموجات الصوتية

    هناك مجالات جديدة فى هذا التخصص، مثل جراحات المناظير

    ووحدات الخصوبة، حيث يتم عمل تداخلات مثل

    التلقيح الصناعى، والتلقيح المجهرى، وأطفال الأنابيب

    هذا بالإضافة للطفرة فى الموجات الصوتية،

    مثل الموجات الصوتية ثلاثية الأبعاد، ورباعية الأبعاد

    عيوب العمل بهذا التخصص:
    إنك من وإنت نايب، لغاية أستاذ

    شغلك مالهوش مواعيد، الصبح، بالليل، الفجر

    وده طبعا مايناسبش البنات، وممكن يعمل لها مشاكل فى بيتها، ومع جوزها

    لكن لو البنت إستحملت، فطبيبة النساء، الحاصلة على دكتوراة، أو ماجستير، أو حتى دبلومة

    مطلوبة بره، فى دول الخليج، جدا جدا جدا، وبأجور مجزية جدا جدا جدا

    يتبع,,,

    ---------- Post added at 08:33 AM ---------- Previous post was at 08:31 AM ----------

    الأطفال
    من أجمل تخصصات الطب، يكفى أنك تتعامل مع هذا الكائنات الملائكية، الأطفال

    مجالات العمل به واسعة جدا، وبه العديد من التخصصات الفرعية

    فهناك حديثى الولادة والمبتسرين، حيث التعامل مع الأطفال بالحضانات

    وهناك الرعاية المركزة،

    وهناك التغذية، حيث تتعامل مع أمراض سوء التغذية الخاصة بالأطفال

    وهناك أمراض الدم والأورام، والكلى،

    وقلب الأطفال، وهو يشبه تخصص القلب الباطنى، فى التعامل مع الموجات الصوتية، وحتى القسطرة

    وللعلم، يوجد أطباء أطفال مشهورين جدا فى مجال الموجا الصوتية للقلب فى الأطفال

    وقسطرة القلب فى الأطفال

    من أهم مميزات العمل بتخصص الأطفال، إنك بعيد عن بعض التخصصات الفرعية، لا تحتاج لإمكانيات ضخمة

    بمعنى إنك ممكن تطبق أحدث التوصيات اللى بتطلع فى أى حتة فى العالم

    حتى لو إنت فى مستشفى قروى فى أعماق الريف

    بعيدا عن بعض التخصصات الفرعية، فهذا التخصص ملائم للبنات

    عيوب هذا التخصص:

    كمية ضخمة جدا من المعلومات، تقريبا محتاج تعرف الباطنة كلها،

    بالإضافة للحاجات الخاصة بالأطفال, زى التغذية

    كمان الأطفال الصغيرين ما بيتكلموش، مش حا تقدر تعرف شكوتهم ولا إيه اللى تاعبهم
    ....
    الجراحة العامة
    طبعا الجراحة العامة هى أم الجراحات، ومن عبائتها خرجت كل الجراحات الخاصة

    طبعا العمل بها مجاله واسع جدا جدا جدا

    لكن، شأنها شأن كل العلوم، والعلوم الطبية بصفة خاصة،

    بدأت فى التفرع لتخصصات فرعية

    مثل: جراحة الأوعية الدموية، جراحة التجميل، جراحة الأطفال،

    الأورام، جراحة المناظير، جراحة الجهاز الهضمى، مناظير الجهاز الهضمى

    تاركة مجالا أضيق كثيرا لما لا يزال يسمى بالجراحة العامة

    نيابة الجراحة من أصعب النيابات، يكفى إنك بتشيل الإستقبال والحوادث

    وأول حد بتشوف المصابين فى الحوادث، وتقيم حالتهم، وتبعتهم للقسم

    المختص، أو تاخدهم عندك
    طبعا تخصص محناج مجهود عضلى وذهنى جامد جدا، "البنات يمتنعون"

    وكل اللى عاوزين تخصص سهل ومريح ومكبرين دماغهم برضه يمتنعون

    نايب الجراحة فى الجامعة أو فى الصحة، فى مستشفى كبير أو صغير

    حيشتغل كويس، وحيشوف حالات، وحيمشى إيده،

    يعنى لو نفسك تبقى جراح، ما تقلقش من المكان اللى حتروح فيه

    فى ناس كتير بتحب جو الدم، والتعقيم، وبتحس بسعادة وهما بيخلصوا

    المريض من آلامه بالمشرط، "بيقطعوا عرق ويسيحوا دم"

    دول طبعا ياخدوا جراحة

    أما اللى بالهم طويــــــــــل، ويحبوا يستنوا، ويحاولوا، ويعيدوا المحاولة

    أحسنلهم ياخدوا باطنة

    طبعا عندك كمية معلومات ضخمة لازم تعرفها

    إزاى تشوف المريض، وتشخصوا، وإيه الفحوصات اللى حتعملها، وحتشوف فيها إيه

    وخطوات الجراحة، والمضاعفات، وتتصرف معاها إزاى؟


    حاولت ألخص أهم مزايا وعيوب هذا التخصص الكبيــــــــــر


    كده نبقى خلصنا التخصصات العامة الأربعة

    تابعونا,,,
    مِتشَعلق!





  2. #2
    بالطو من بلاطي
    التقييم التقييم التقييم التقييم التقييم التقييم التقييم التقييم التقييم التقييم التقييم التقييم
    الصورة الرمزية Medo
    تاريخ التسجيل
    Jul 2006
    الدولة
    على أرض الواقع
    المشاركات
    6,553
    مودي هو
    Bored
    Mentioned
    1 Post(s)
    Tagged
    2 Thread(s)
    التخديـــــر

    التخدير تخصص ممتاز جدا جدا جدا

    لكن مش سهل أبدا

    لازم تعرف كل حاجة فى الطب الباطنى، لأنك حتشوف المريض قبل العملية

    ولازم تعرف لو كان عنده حاجة فى القلب، أو الكبد، أو الكلى،...........

    وتعرف حتتصرف معاه إزاى

    كمان لازم تعرف كل حاجة عن كل تخصصات الجراحة،

    لازم نعرف العملية اللى حتخدر المريض لها

    خطواتها إيه، حتاخد وقت قد إيه، مضاعفاتها المتوقعة إيه، حتتصرف معاها إزاى

    حتبدأ تخفف التخدير إمتى، وحتصحى مريضك إمتى

    تذكر، ما حدش بيفتكر طبيب التخدير غير لما بتحصل مصيبة

    يعنى لو العملية نجحت كل المجد للجراح

    ولو فشلت، كل المسئولية على التخدير

    "إفتكر سعاد نصر"

    ده طبعا غير شغلك فى العناية المركزة

    ناس كتير ما تعرفش إن طبيب التخدير هو اللى بيشتغل فى العناية المركزة

    بالنسبة للفلوس، فنايب التخدير أغنى نايب،

    يعنى وإنت صغير حتقدر تتنطط، ومن العيادة دى للمستشفى دى، للمستوصف ده

    لوزة عند بتاع الأنف والأذن، D & C عند بتاع النسا، shift فى العناية هنا أو هناك

    فى ميزة مهمة جدا فى التخدير، أول ما العيان يصحى، ويكح، مش بتاعك

    مشاكلك ومسئوليتك كلها، والعيان متخدر

    بعد ما يصحى، مش مسئوليتك، يعنى تروح تنام وتشبع نوم

    ماحدش حيتصل بيك ويقول إلحق حصل كذ أو كذا للمريض

    "ممكن يصحوك علشان شغل جديد"


    حنتابع بعد كده باقى تخصصات الجراحة الخاصة

    جـراحة المـخ والأعصـاب


    تخصص دقيق من تخصصات الجراحة الخاصة

    العمل بهذا التخصص يتطلب جراحا ذو طبيعة خاصة

    فلابد أن يكون طبيبا باطنيا جيدا، وإنتم عارفين شيت ال Neuro من أرخم الشيتات

    وحالة ال Neuor أرخم حالة تشوفها فى الإمتحان

    فلما يبقى ده شغلك، موضوع صعب

    ده غير إنك لازم تكون جراح متميز، ال field بتاع العملية بيكون ضيق جدا

    وأى غلطة ممكن تطير center فى المخ

    نيابة جراحة المخ والأعصاب من أصعب النيابات

    طبعا فى الحوادث، ما فيش مصاب غير ما بيتخبط فى دماغه

    وبيدخل معاك فى إرتجاج، وأعراض ما بعد الإرتجاج

    ومتابعة، وأشعة مقطعية، وبعد كده حيتفتح ولا لأ، شغلانة

    ده غير اللستة، وتحضيرك لحالات اللستة

    ده غير متابعتك للحالات، أحيانا كتير تكون حالات صعبة وعايزة متابعة

    وطبعا لازم تقرا Neuro باطنة كويس جدا، وتعمل شيت لكل عيان

    وتعرف إيه اللى حايتعمل له، وتعرف خطوات الجراحة

    المشكلة فى التخصص ده إنه مش موجود كتير فى الصحة، غير فى بعض المستشفيات الكبيرة

    يعنى لو خلصت نيابة فى الجامعة وما تعينتش، حتتسوح

    المشكلة التانية إن ما فيش ماجشتير خاص بجراحة المخ والأعصاب

    يعنى بتاخد ماجستير جراحة عامة

    تخيل، إنك لازم تشوف كل الشغل ده،

    وتقرا فى تخصصك، علشان تظهر إنك قارى قدام أساتذتك

    وكمان تقرا جراحة عامة، علشان تنجح بتقدير فى الماجستير، مأساة

    وبعد ده كله، لو ما تعينتش حتخرج بره معاك ماجستير جراحة عامة، وما بتعرفش تعمل زايدة

    طبعا البنات يمتنعوووووون

    طول ما إنت صغير، شغلك مش حايبقى كتير

    لكن لو ثابرت وإتحملت، كله يوسع

    عيادت أساتذة المخ والأعصاب، المرضى قاعدين على السلم

    أعرف واحد بيدخل المرضى فى عيادته كل 3 مع بعض

    يتبع,,,

    ---------- Post added at 08:37 AM ---------- Previous post was at 08:36 AM ----------

    جراحة القلب والصدر

    ده طبعا من تخصصات الموضة، اللى ماشى جدا اليومين دول

    مفيش بيت النهارده، إلا وفيه مريض شريان تاجى

    وعامل عملية قلب مفتوح، وترقيع شرايين

    لدرجة إن الموضوع ده بقى نوع من البريستيج، وبيتباهوا بيه

    أصلها من أمراض الناس الأغنياء، زى ما الدرن مثلا مرض الفقراء

    ما علينا،

    نيابة القلب والصدر متعبة جدا جدا جدا

    إستقبال، وحوادث، وتحضير لست عمليات

    مافيش مصاب فى حادثة، غير ما يتخبط فى صدره

    وعملياتهم إيه، بهدلة، أقل عملية بتاخد من 2.5 ل 3 ساعات

    طبعا محتاج تعرف باطنة كويس جدا،

    علشان تشخص مريض القلب، وتحدد إذا كان محتاج جراحة ولا لأ
    .
    ولازم تكون جراح كويس، وتقرا كتير فى تخصصك، وكل يوم فيه جديد

    دا غير الجراحة العامة، أصل زى جراحة المخ والأعصاب ما لهاش ماجستير مستقل

    يعنى ما فيش شهادة فى مصر إسمها ماجستير جراحة القلب والصدر

    إنت بتاخد ماجستير جراحة عامة، لكن فى دكتوراة جراحة القلب والصدر

    التخصص مش موجود فى الصحة، غير فى أماكن قليلة جدا، زى معهد القلب

    يعنى لو أخدت ماجستير وما تعينتش، وما عندكش واسطة تروح المعهد، حتتسوح

    مجالات الشغل واسعة جدا، جراحات القلب، والصدر، والمناظير، وعنابة مركزة

    وإنت صغير حتشتغل، تساعد فى العمليات، وتقعد فى العناية تتابع المرضى بعد العمليات

    ولما تكبر وتفتح عيادة، حا تشتغل زى دكتور القلب الباطنى

    غير العمليات اللى حتعملها،

    ...

    الأشـــــــــعة

    الأشعة من التخصصات الطبية الجميلة جدا

    بعيدا عن الشكل التقليدى للطبيب، الحلم بالبالطو الأبيض والسماعة

    أو المشرط وغرفة العمليات، والتعقيـــــم،

    تخصص مختلف، لكن لو عرفته عن قرب، حتحبه جدا

    طبعا داخل فى كل التخصصات الطبية، بلا إستثناء

    لازم يكون عندك فكرة، ولو محدودة، عن كل التخصصات الطبية

    علشان تعرف الفحص المناسب لكل مرض، وحتعمل له فحص إيه، وتشخصه إزاى

    فى المستشفى، الكل بيحتاجلك وعاوز منك خدمات،

    لأنه من التخصصات الخدمية، لازم تعمل علاقات ودعاية كويسة جدا فى الوسط الطبى

    لكن تعاملك مع المرضى مش كبير، يا دوبك تعمل له الأشعة، ومع السلامة

    ودى ميزة كويسة جدا

    زمان، كانت الأشعة على قد أشعة X، دلوقتى العملية وسعت جدا جدا جدا

    موجات صوتية على الجسم كله، أشعة مقطعية، رنين مغناطيسى،

    ده طبعا غير قسطرة الشرايين الطرفية، قسطرة تشخيصية وعلاجية

    الأشعة من أكتر التخصصات اللى ممكن تعمل فيها فلوس

    وإنت صغير، ممكن تلف على المراكز، والمستشفيات

    تشتغل فيها sonar، أو CT أو MRI

    لما تكبر ويبقى لك عيادتك، كفاية إنك تبدأ بجهاز أشعة X وجهاز sonar

    وممكن تتطور حسب إمكانياتك،

    طبعا أجهزة ال CT وال MRI بنتكلم فى ملايين

    لكن بتجيب تمنها فى 3 - 4 سنين بالكتير

    وطبعا مطلوب بره، وجوة،

    يتبع,,,

    ---------- Post added at 08:37 AM ---------- Previous post was at 08:37 AM ----------

    الأشعة العلاجيـــــــــة

    الأشعة العلاجية أحد التخصصات الفرعية للأشعة

    وهى عادة وحدة تابعة لقسم الأشعة فى المستشفيات

    لكن عادة يكون لها نيابة مستقلة

    ولها ماجستير ودكتوراة خاصتين بها

    الأشعة العلاجية تختص طبعا بالإستخدامات العلاجية للأشعة

    تقريبا كل شغلهم على مرضى الأورام، بلإضافة لبعض الحالات القليلة الأخرى

    تخصص صعب طبعا، لازم يدرس أساسيات الأشعة، وأنواعها، وطرق تعريض الجسم لها

    ولازم يدرس طرق تشخيص، ومتابعة الأورام، ودرجاتها

    وغالبا هما بيقدموا العلاج الكيماوى للمريض أيضا

    طبعا شغل واسع وكتير، حالاتهم كتير، ربنا يعافينا ويعافيكم

    شغلهم جوة البلد، لازم تكون فى مستشفى كبير، جامعى أو تعليمى

    وبرة، مطلوب جدا جدا جدا

    ...
    جراحة العظـــــــام

    جراحة العظام من التخصصات الجراحية الجميلة

    مجال شغلك واسع جدا جدا جدا

    يعنى بتشتغل طبيب، بتتابع المرضى فى عيادتك

    ومعظم مرضى الأمراض الروماتزمية بيلجأوا لطبيب العظام

    ده غير شغلك الأساسى،

    جبس، جباير، تثبيت داخلى وخارجى، إصلاح تشوهات

    وده طبعا غير المناظير، منظار الركبة، والغضروف

    يعنى تخصص شغله جميل، وممتع، للى غاوى جراحة وغاوى شغل

    المكان ما بيفرقش كتير، 90 % من حجم شغلك مش محتاج إمكانيات ضخمة

    نيابة العظام مرهقة جدا جدا جدا

    أى واحد يتخبط خبطة هايفة، لازم تشوفه،

    وطبعا مافيش حادثة متوسطة أو جامدة،

    من غير كسر بسيط، أو مركب هنا أو هنـا

    وللسبب ده، ولأن الشغل نفسه محتاج مجهود عضلى جامد، بالذات فى رد الكسور،

    فالتخصص ده غير مناسب بالمرة للبنات

    أعتقد إنى ما شفتش فى حياتى بنت جراحة عظام

    مجال شغلك موجود وبكثرة، ومطلوب فى الخارج بصورة لا بأس بها
    يتبع,,

    ---------- Post added at 08:38 AM ---------- Previous post was at 08:37 AM ----------

    الأنف والأذن والحنجرة

    مزاياه

    تخصص مريح مفيهوش نبتشيات ولا سهر مفيش غير يمكن استدعاء في الحالات الطارئة

    وده نادر لما بيحصل وفي نفس الوقت بيتحط اسمي في النبتشيات بتاعة المستشفي

    بعد ما ابقي اخصائي طبعا واخد فلوس النبتشية

    غير انه شغله نفسه مريح يعني مفيهوش عك كتير والامراض بتاعته معروفة وبسيطة وسهلة التشخيص بس طبعا فيه حالات مش سهلة

    ثانيا يجمع بين مزايا الجراحة ومزايا الباطنات لانه فيه الاتنين

    ثالثا ماديا الي حد ما كويس يعني مش فوق قؤي ولا تحت قؤي ممكن تقؤل وسط

    رابعا دراسته لذيذة للي يحبه وبسيطة وسهل تاخد فيه ماستر او شهادة اعلي من الماستر

    مطلوب في السفر بره

    عيوبة

    تخصصات كتير بتدخل معاك في شغل الانف والاذن زي بتوع الاطفال والممارس العام

    يعني شغله موزع علي تخصصات كتير ويمكن كمان بتوع الباطنة

    مجال العمليات بتاعته مش كبير يعني الفيلد نفسه مش واسع يعني مش هاتقدر تشتغل فيه براحتك

    لو اشتغلت في الصحة مش هاتعمل غير لوز ولحمية ويقولوا عليك دكتور اللوز

    اسعار عملياته رخيصة يعني اللوز مثلا ممكن الدكتور ياخد من 300 الي 400 جنيه

    لو انت صاحب طموح عالي مش هو التخصص اللي يرضي طموحك قوي

    وده رأى منقول لنايب أنف وأذن

    يتبع,,,,

    ---------- Post added at 08:39 AM ---------- Previous post was at 08:38 AM ----------

    الرمد
    بداية لاني عاشق للرمد فهيكون كلامي فيه شوية تحفظ للتخصص ده
    طب وجراحة العيون ..
    من اجمل التخصصات اللي ممكن تلاقيها في حياتك تخصص مميزاته كتير جدا وعيوبه قليله جدا جدا

    أولا ... المميزات

    1. تخصص نضيف جدا
    2 . مر يــــح جدا جدا
    3. مربح جدا
    4. ودي من اهم مميزاته انه تخصص مستقل بذاته يعني بعيد عن قرف الباطنه والجراحه ( هوه طبعا في تشابك مع التخصصات التانيه بس مش كتير شوية syndromes بنشوفهم كل فين وفين
    5 . فرصة سفره ممتازه ومن اعلي الرواتب في الدول العربيه
    6. تخصص رائع للفميل لأنه غالبا مفيهوش نوبتجيات ولا وجع دماغ
    7 . جراحات الرمد من اجمل الجراحات
    8 . في مصر الرمد من اكتر التخصصات الممتازه اللي ما تختلفش كتير عن الرمدفي الدول الاوروبيه لأن في مصر دكاتره من اكبر دكاترة العالم في الرمد

    أما بالنسبه للعيوب

    1 . مكلف ... بمعني تكاليف العياده كتيره لأنه معتمد علي الالات
    2 . جراحات الرمد fine جدا بمعني اي خطأ بعين مريض
    3 . أماكن تعلمه في مصر مش كتيره ( الي حد ما مقتصر علي الجامعات )

    ردا علي بعض الاسئلة

    ايه افضل مكان فى الرمد بره الجامعه طبعا؟
    معهد بحوث الرمد بالجيزه ومستشفي روض الفرج للعيون تليهم المستشفيات التعليميه أما بالنسبه للصحه فالتعليم فيها مش أد كده لأنها مش مجهزه كويس وكمان كفاءة الاطباء فيها مش أد كده

    ولو مجموعى ماجبش المكان ده اعمل ايه؟ ياترى اعمل انتداب لمستشفى تعليمى هاتعلم فيها كويس ولا فيزوتور فى الجامعه؟
    أولا تعمل فيزيتور في الجامعه دا احسن مكان ممكن تتعلم فيه رمد نظرا للأمكانيات والrate لضخم للحالات

    وايه افضل جامعه اعمل فيها فيزوتور واتعلم فيها؟
    جامعة طنطا من افضل جامعات مصر لأن ال rate فيها عالي جدا جدا لأنها تخد مالفلاحين اللي هما اكتر ناس معرضين للمياه البيضاء ومشاكل الشمس الاخريوالقصر العيني طبعا مش محتاجه كلام

    وماتنساش كمان الزماله المصريه ياترى طريقها كويس ولا لا؟
    أما عن الزماله المصريه انا معلوماتي فيها مش كتيره بس اللي اعرفه انها ممتازه في الرمد لأنك بتاخدها في مكان محترم زي معهد البحوث .. وأعرف ناس سافروا بعدها قالو انها معترف بيها في الدول العربيه وبيقدروها كويس أوي

    وفرصتى ايه ان انا اتعلم جراحات الرمد؟
    بالنسبه للجراحات .. منا تحلمش وانت نايب بأكتر من cataract & glocoma & squint & ptyregium &جراحات التجميليه للجفون .. أمالجراحات الشبكيه والسائل الزجاجي فصعب جدا وانت نايب لكن الفرصه بتزيد لنايب الجامعه

    وصحيح ان الرمد محتاج فلوس كتير عشان تقدر تفتح عياده ؟
    بصراحه اه علشان تفتح عياده محترمه علي الاقل 50 ألف قابله للزياده بس الموضوع ده اتغلبنا عليه بطريقتين الاولي .. انك تشتري اجهزه مستعمله الثانيه .. انك تجيب الاجهزه بالتقسيط

    وشغل البرايفت اقدر الاقيه بسهوله وبسرعه ولا لا؟
    ان شاء الله تلاقيه بسهوله وتعمل اسم بسرعه لأن دكاترة الرمد قليلين جدا جدا جدا
    يارب اكون قدرت اوصل اي معلومه ..
    رأى منقول عن نائب رمد
    يتبع,,,

    ---------- Post added at 08:40 AM ---------- Previous post was at 08:39 AM ----------

    خلصنا التخصصات العامة وبعض اسبيشيلات الجراحة
    نستكمل معا بعض اسبيشيالات الباطنة

    "الطب النفسي وطب الأعصاب" هو الاسم الدقيق أو

    " نفسية وعصبية" اختصارا.


    إيه اللي جاب "الطب النفسي" على "طب الأعصاب" ..... إيه الهبل ده؟

    أكيد كلكم تسألوا كدة ...... الإجابة أولا: أنت أكيد في مصر ثانيا: ده رأي بعض المدارس الطبية في كل دول العالم تقريبا بما فيهم الولايات

    المتحدة أمالطب الحديث ما زال حتى الآن التخصص لابد أن يشتمل على تدريب في Neurology وتدريب في Psychiatry قبل السماح

    بالتخصص ..... ولكن إحنا بنطبقها بطريقة مصرية .


    المشكلة تبدأ من المجلس الأعلى للجامعات الذي يضع مسمى الشهادات في البلد والمفاجأة إنك ما عندكش ماجستير غير في الاثنين مخلطين على بعض.

    والواقع أن الأطباء يتدربوا على تخصص واحد من الاثنين يشتغل به وقبل امتحان الماجستير بيلم التاني كدة علشان ينجح ..... ولا يوجد

    مكان خارج الجامعة يجمع الاثنين. أما الجامعة فكل شيخ له طريقة ومن أحسن الطرق في رأيي طريقة عين شمس لأن النائب هناك 6

    شهور نفسي و6 شهور أعصاب لغاية آخرالنيابة.

    والحق إن فيه ارتباط بين التخصصين في بعض الحالات فقط : مثل الصرع ومرض باركنسون والتصلب المتناثر .... وقليل من الأمراض

    العصبية الأخرى التي ممكن تظهر بأعراض نفسية خالصة أو أعراض عصبية خالصة أو خليط من الاثنين.

    يعني الدكتور الشاطر في أي من التخصصين لازم يكون ملم بجزء كبير من التخصص الثاني علشان بتاع النفسية ما يضيعش مريض

    بسبب إنه مالقطش إن عنده عرض عصبي مثلا قد يكون سببه ورم في المخ وحتى لا يضيع طبيب الأعصاب مريض عصبي مرضه كله بدأ

    بأعراض نفسية مثل بعض حالات باركنسون.

    ومن أراد المزيد في النقطة ده يرجع لمجلة BMJ Career شهر فبراير سنة 2005 كانوا كاتبين في الموضوع ده.

    ولكن علشان تكون دكتور شاطر وأمين .... لازم تركز على واحد وبلاش شغل السوق اللي حيودي الطب في داهية ....... وبلاش الهزيمة

    النفسية وتتضحك على الناس : أنا دكتور مخ وأعصاب لو أخذت الطب النفسي.


    طب الأعصابNeurology


    ده الترجمة الصحيحة ولكن في واحدابن حلال علشان يلم شغل السوق بيزود قبلها "المخ" وما عرفش إيه موضوع المخ ده .... وأنا لا

    أعرف مرض يجي في المخ لوحده !!!!

    تخصص مظلوم ........ نبدأها بصراحة ........ محدش معترف بنا حتى زملاءنا الأطباء .... وكله عند جراحين المخ والأعصاب ....

    للأسف !!!! حتى الإعلام الرسمي لما يحب يجيب أستاذ يتكلم عن الصرع مثلا ....... يجيب جراح .... ضاربا عرض الحائط بكل قواعد

    الأدب في احترام التخصص .... متجاهلين عظماء مصر في طب الأعصاب مثل د/ قورة أو د/ عبد اللطيف عثمان ...... وغيرهم كثيرمن أساتذتنا العظام.

    العيوب

    عيبه الأول هذا التخصص مسروق في شغل السوق عن طريق أطباء جراحة الأعصاب وأطباء الباطنة العامة وأخيرا أطباء جراحة العظام


    عيبه الثاني إن التدريب بالنسبة لوزارة الصحة فيه قليل جدا جدا مقتصر فقط على المستشفيات التعليمية وأقوى قسم أعصاب في وزارة الصحة هو في معهد ناصر.

    ده العيب الثاني ..... ولكن سهل التغلب عليه بالانتداب للجامعة أثناء الماجستير

    العيب الثالث: إنه يحتاج مكان مجهز بأجهزة أشعة مقطعية وأجهزة رسم مخ على الأقل بالإضافة للرنين ومعمل النوم لو عايز تشتغل صح وده مش متوفركثير في الوزارة.

    أنا بدأت بالعيوب للأمانة.

    المميزات:

    • ما حدش بيفهم في الحاجات ده غيرك أنت وبس ....... خلي ده في دماغك مريضالأعصاب ده زي اللغز كل الأطباء بيجروا منه ويخافوا

    منه .... والأعصاب مش جلطة وصرع فقط الدنيا كبيرة والأعصاب طايلة كل حتة في الجسم وفي أمراض كثيرعندنا تبدأ بانفلات في البول

    وهبوط في الضغط وساعات حول في العين ..... يكفيك فخرا إن المريض بتاعك ما حدش يقدر يمد إيده عليه من أصغر طبيب امتياز لأكبر أستاذ في تخصص تاني.

    • اللي غاوي كلكعة في رسم مخ ورسم نوم ورسم أعصاب .... والحاجات ده مش أي حد بيفهم فيه في كل محافظة ..... قليل جدا بالذات رسم النوم Polysomnography

    • لنا سكة في العناية طبعا مش حالة سكتة الدماغ Stroke لأن ده بيهبشها بتوع الباطنة والجراحة سيبها لهم يموتوها وخليك في التقيل Maysthenia & Guillan Barre & ALS

    • الصرع بتاعك ومحدش بيفهم فيه ومع الاعتذار لكل الأطباء بما فيهم جراحين المخ والأعصاب ، الصرع مش: تجرتول وديباكين

    وإبانوتين ورسم مخ ..... فيه حاجات كثير جوة الكلمات ده كلهم بيهملوها ..... فما بالك ببقية الأدوية والفحوصات.

    • أمراض النوم تخصص جديد في مصر وهو مشترك بين ثلاثة تخصصات: طب الأعصاب والطب النفسي والصدر. وفي مستشفى العباسية

    للطب النفسي بدل المعمل اثنين لعمل رسم النوم .... يعني في أمل بتاع الوزارة يفهم فيه لو انتدب نفسه هناك

    • أشهر أمراض الأعصاب إحصائيا: Headache ثم Epilepsy ثم Neuropathy أما سكتة الدماغ فسببها بعيد عننا اسأل عنها بتوع

    القلب والضغط والسكر هما اللي بيشوفوها ليل نهار .... ولما بيحتاسوا في تشخيص بعض أنواعها الصعبة بيدورا علينا .....

    • فرص السفر فيه ممتازة لو معك شهادة خبرة من مكان محترم ..... ورسم المخ في السعودية ممكن تعيش منه فقط وتقفل شنطتك وتروح مبسوط بعيد عن الأدوية.

    الطب النفسي

    تخصص مظلوم ............... نبدأها من الأول .... مجنون ... دكتور مجانين .... بتاع المجانين أهو ..... لاسع ....... كلمات حتسمعها من
    كل الناس حتى زمايلك الأطباء للأسف.

    العيوب:
    وصمة العار Stigma وهذه على مستوى العالم وكتب فيها بحوث وكتب ومقالات طويلة في كل الدول حتى إن الكلية الملكية بلندن للأطباء النفسيين أطلقت حملة من عدة سنوات باسم Changing the mind علشان تحسن صورة التخصص ده أمام بقية الأطباء أولا ثم عوام الناس ثانيا ....... وصمة العار هذه ستلصق بك من أهلك من جيرانك من زملائك ... لدرجة إن في كثير من الأطباءالنفسيين يخجل من التصريح بتخصصه.

    هذا هو العيب الوحيد ... لذا يحتاج لشخص قوي واضح الرؤية لا يتأثر بكلام الناس ... فقط

    المميزات:

    1- فرص السفر أضعاف أضعاف التخصصات الأخرى من وأنت نائب وطالع .... الدول العربية ما تقدرش تجيب فيه خبير أجنبي كبقية التخصصات ببساطة لازم واحدعربي .....
    2
    - انسى إن حد يفهم معك في حالتك من باب عيادتك لغاية لما يرجع لك المريض ثاني مرورا بالصيدلي .... يعني تخصص صح ماحدش حيعك معك في الحالة زي الضغط والسكر مثلا

    3- اللي بيحب شغل اليد عندك ECT وده من العلاجات عندنا ولما تشوف نتايجه حتعرف قيمته وسيبك من الهبل بتاع التلفزيون

    4- الطب النفسي مش مجانين ولا انفصال في الشخصية .... وعلى فكرة اسمها فصام schizophrenia وهو في العقل "الترجمة الحرفية:

    فصام العقل أي تفكك وظائف العقل" وليس في الشخصية أما بتاع الشخصية فاسمه DISSOCATION طبعابرده فكك من الهبل بتاع

    Hyde & Jackle

    5- مليء بالتخصصات الفرعية التي تدر دخلا وفيرا في العمل لو أتقنتها: الطب النفسي للأطفال والمراهقين أمراضهم كثيرة وصعبة وتحتاج

    خبرة مثل مرض فرط الحركة ونقص الانتباه ADHD ومرض التوحد Autism وأمراض الشخصية والسلوك ،طب علاج الإدمان ......

    مصر غرقانة بالحشاشين والمدمنين للأسف ..... وعلاجهم صعب ومحتاج خبرة كبيرة في الشق النفسي والشق الدوائي، الطب النفسي

    للمسنين .... ألزهايمر بتاعنا إحنا بس ، ..... الطب النفسي المتعلق بالمشاكل الجنسية بداء من الانحرافات والشذوذ ثم وصولا لمشاكل

    العلاقة بين الزوجين ..... والطبيب المتمرن فيها سمعته بين الناس زي الذهب لأنه حيوفرعليهم ثمن الفياجرا ..... الطب النفسي الشرعي

    الخاص بتقييم المجرمين ..... وهذا مجال عمله في السعودية رحب جدا جدا أكثر من مصر لأنه في مصر ينحصر في 3 أماكن فقط (العباسية والخانكة والمعمورة).

    6- ممكن تعلمه بسهولة في وزارة الصحة أو في الجامعة .... ومعروف نائب وزارة الصحة بالذات العباسية والمعمورة والخانكة وقريبا

    مستشفى المطارأقوى بمراحل من نائب الجامعة بالذات في علاج الإدمان ويوجد قسم كبيرللأطفال في العباسية ليس له مثيل في الجامعة

    وقسم آخر للمراهقين في حلوان ليس له مثيل في الجامعة وعلاج للإدمان في مستشفى المطار والمعمورة غيرمتوفر أصلا في الجامعة .....

    بل في أحد مؤتمراتنا مؤخرا سمعنا من نواب بعضالجامعات أنهم ليس عندهم قسم داخلي بل عيادة خارجية فقط !!!!!

    رأى منقول لنائب نفسية وعصبية

    يتبع,,,

    ---------- Post added at 08:42 AM ---------- Previous post was at 08:40 AM ----------

    تخصص الجلدية

    المزايـــــــــــــا

    أولا

    تخصص مريح جدا لانه ولا فيه نبتشيات ولا سهر ولا وجع دماغ

    ثانيا

    ممتع في شغله خصوصا بعد دخول شغل الليزر فيه

    ثالثا

    مفيهوش خطر يعني تخصص هادئ

    رابعا

    مربح خصوصا بعد شغل الليزر اللي حقق انجازات كبيرة في التخصص ده ورفع قيمته أوي

    كمان بعد التعمق في شغل الاندرولوجي برده رفع قيمته أوي

    والفيمال بتوع الجلدية مطلوبين اوي في دلو الخليج

    خامسا

    مناسب جدا للفيمال لانه هاتقدر الفيمال توفق بين الشغل وبين الاسرة بحكم هدوء التخصص وراحته

    سادسا

    التعليم فيه مش محتاج مستشفي كبيرة يعني ممكن بسهولة جدا تجيب كتاب وتقرا منه وتشوف الصور وتنجحيعني ممكن تعلم نفسك بنفسك

    بس طبعا شغل الليزر ولا شغل ال اندرولوجي عاوز شغل عملي واكينيكلي في مستشفي او مكان كويس



    العيـــــــــــــــوب

    أولا

    بالنسبة لناس كتير مش هو التخصص اللي يرضي طموح دكاترة كتير بس في نفس الوقت فيه ناس بتموووت في التخصص ده

    ثانيا

    لوعاوز تتعلم شغل الليزر مش هاتلاقي اماكن كتير تتعلم فيها يمكن في الجامعات
    ومش اي جامعات يمكن جامعة زي الزقازيق هاتلاقي فيها قسم كويس بس ازاي
    تشتغل هناك هيا دي الفكرة


    مش شايف عيوب تانية يمكن يكون فيه بس انابصراحة مش شايف

    بس انا شايف حاجة مهمة اوي

    انه مميزاته أكتر من عيوبه خصوصا للفيمال

    يتبع,,,
    مِتشَعلق!





  3. #3
    بالطو سوبر لوكس
    التقييم التقييم التقييم التقييم التقييم التقييم
    الصورة الرمزية abdoo
    تاريخ التسجيل
    Sep 2008
    الدولة
    هنا ف مكانى
    المشاركات
    1,394
    Mentioned
    0 Post(s)
    Tagged
    0 Thread(s)
    ربنا يكرمك يا ميدو

  4. #4
    مراقب قسم
    التقييم
    التقييم التقييم التقييم التقييم التقييم التقييم التقييم التقييم التقييم التقييم التقييم التقييم التقييم
    الصورة الرمزية M.elesawy
    تاريخ التسجيل
    Oct 2006
    الدولة
    Cairo, Egypt, Egypt
    المشاركات
    10,762
    مودي هو
    Sad
    Mentioned
    10 Post(s)
    Tagged
    6 Thread(s)
    رائع يا ميدو

    استمر


    مرغم عليك يا صبح مغصوب يا ليل

    لا دخلتها برجليا ولا كان لى ميل

  5. #5
    بالطو من بلاطي
    التقييم
    التقييم التقييم التقييم التقييم التقييم التقييم التقييم التقييم التقييم التقييم التقييم
    الصورة الرمزية محمد حسان
    تاريخ التسجيل
    Jun 2009
    الدولة
    With myself
    المشاركات
    15,556
    مودي هو
    Aggressive
    Mentioned
    0 Post(s)
    Tagged
    1 Thread(s)

    جزاك الله كل خير

    معلش عندى استفسارين
    "أمراض القلب والأوعية الدموية" و جراحة القلب والصدر

    الفرق بينهم
    ان الجراح بيعمل open heart surgery

    الاولانى كشف وتشخيص
    والتانى يحدد بناء على كشف دكتور امراض القلب والاوعية الدموية اذا كان هيحتاج جراحة ولا لا ؟

    التخصص مش موجود فى الصحة، غير فى أماكن قليلة جدا، زى معهد القلب

    يعنى لو أخدت ماجستير وما تعينتش، وما عندكش واسطة تروح المعهد، حتتسوح
    طب لو مليش نيابة
    ومفيش واسطة
    هعمل ايه ؟ ؟
    ‎" طالب الحق يكفيه دليل ، و صاحب الهوى لا يكفيه ألف دليل ، الجاهل يتعلّم و صاحب الهوى ليس لنا عليه سبيل"
    الشيخ الألباني رحمه الله

  6. #6
    بالطو من بلاطي
    التقييم التقييم التقييم التقييم التقييم التقييم التقييم التقييم التقييم التقييم التقييم التقييم
    الصورة الرمزية shakal
    تاريخ التسجيل
    Jan 2008
    الدولة
    ؟؟؟؟؟؟؟؟؟؟
    المشاركات
    2,315
    مودي هو
    In Love
    Mentioned
    0 Post(s)
    Tagged
    1 Thread(s)
    الموضوع جامد ومفيد جدا جدا
    انا كنت عاوزه اسال عن الراديولوجي ...ممكن حد يتخصص radiodiagnosis الاول وبعدين يكمل ك radiotherapy.بعد فتره ...ده هيكون سهل ولا صعب ...؟؟؟

  7. #7
    بالطو من بلاطي
    التقييم التقييم التقييم التقييم التقييم التقييم التقييم التقييم التقييم التقييم التقييم
    الصورة الرمزية سهر
    تاريخ التسجيل
    Nov 2009
    الدولة
    somewhere over the rainbow
    المشاركات
    3,098
    Mentioned
    0 Post(s)
    Tagged
    0 Thread(s)
    هو التخصصات على حسب التقدير صح؟ بس انا عايزة اعرف ايه تقديرات التخصصات من الاعلى فالاقل
    اللهم اتنا فى الدنيا حسنة وفى الاخرة حسنة وقنا عذاب النار

  8. #8
    بالطو من بلاطي
    التقييم
    التقييم التقييم التقييم
    الصورة الرمزية Leedoz
    تاريخ التسجيل
    May 2008
    المشاركات
    6,398
    مودي هو
    Inspired
    Mentioned
    1 Post(s)
    Tagged
    0 Thread(s)
    موضووع اكتر من رااائع بجد ... انا مبدأتش افهم الليلة دي الا واناا في خاامسة ... وكماان مش كل المعلوماات دي اعرفهاا ...

    ربناا يبااركلك ...
    http://www.youtube.com/watch?v=HvQle8nP5YM

    طفل ينطق الشهاادة ...
    سبحاان الله ...




  9. #9
    بالطو من بلاطي
    التقييم التقييم التقييم التقييم التقييم التقييم التقييم التقييم التقييم التقييم
    الصورة الرمزية Samar Gaber
    تاريخ التسجيل
    Nov 2008
    الدولة
    في طب عين شمس
    المشاركات
    911
    مودي هو
    Sick
    Mentioned
    1 Post(s)
    Tagged
    0 Thread(s)
    lليه يا جماعه كل حاجه متنفعش البنات متنقعش البنات اومال ايه اللي ينفع


  10. #10
    بالطو من بلاطي
    التقييم
    التقييم التقييم التقييم
    الصورة الرمزية Leedoz
    تاريخ التسجيل
    May 2008
    المشاركات
    6,398
    مودي هو
    Inspired
    Mentioned
    1 Post(s)
    Tagged
    0 Thread(s)
    اقتباس المشاركة الأصلية كتبت بواسطة Samar Gaber مشاهدة المشاركة
    lليه يا جماعه كل حاجه متنفعش البنات متنقعش البنات اومال ايه اللي ينفع
    صيدلة او اسناان ...
    http://www.youtube.com/watch?v=HvQle8nP5YM

    طفل ينطق الشهاادة ...
    سبحاان الله ...




+ الرد على الموضوع
صفحة 1 من 4 1 2 3 ... الأخيرةالأخيرة

Thread Information

Users Browsing this Thread

في دلوقتي 1 بني ادمين بيتصفحوا الموضوع ده. (0 اعضاء و 1 ضيوف)

     

المواضيع المتشابهه

  1. مشاركات: 7
    آخر مشاركة: 31st December 2009, 04:04 PM
  2. كيف تختار التخصص بعد التخرج ؟
    By Sally in forum مواقع طبية
    مشاركات: 38
    آخر مشاركة: 1st October 2009, 02:02 AM
  3. اخر كلام ..
    By Medo in forum رابطة مشجعي الزمالك
    مشاركات: 3
    آخر مشاركة: 15th August 2009, 07:00 PM
  4. كلام من ذهب؟؟؟
    By the moon shadow in forum ألبوم الصــــور
    مشاركات: 3
    آخر مشاركة: 1st May 2009, 10:05 PM

Tags for this Thread

تعليمات المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك